نار نار
زجل فؤاد العنيز
***************
يا حكاية
نحلف بيك بعد المنّان
حروفك هبيلة
وسطورك مشلولة
يا كف
سبقها للحنة صاروخ
يا دف
سبقاتو للزفة قنبولة
يا طفيل
سبقاتو للرشد نزوات
لا تبكيش يا امرة
شكون قالك ولدك مات
شكون قالك
ولدك
فجروا لعدو هو و كورتو
شكون قالك
جثة
من تحت لنقاض جبدوه
شكون قالك
قتلوا اختو عمتو وبوه
شكون قالك
فجروا لحكايات
فراسو الصغير
شكون قالك
عدموا احلامو
بلا حكم قاضي
بلا شهود
ليهود
بلا شرع
شكون قالك
لعرب ساكتة
شكون قالك
لمسلمين ما سايقينش لخبار
شكون قالك ليل الظلم
يغطّي شمس النهار
شكون قالك متنا
واخا تشوفينا صمتنا
صوتنا تحت لحلق كيتسنى
يفجّر انهار
يزرع جنّة
يزند نار
توقد منّا
لهيب مأجج
يمحي عار
قَرّبْ ينبدنا
وذراعنا ذراعنا
ناوي ينوب عل لكلام
عل الزغاريت والصلى والسلام
صلاتنا للحرب ناوية
يا دم رخصوه لعدا
حتى عاد والو
يا همّ بخّسوه الرهوط
تا زهارو ذبالو
غدّا تجيك اخبارهم
يمكن ما نحرقوهمش احنا
ويمكن يمكن
تحرقهم نارهم
يمكن ينيّشو على دارنا
ويريبّبوا دارهم
ويمكن
شعبنا يتمكّْن
يثور ويغضب
ضربة فينا وضربة فالكلب
ضربة تحنيه
ضربة تدحيه
وضربة تفنيه
كي حكاية عنيدة
حنات راسها قهرة
حلف بيها شهيد وشهيدة
فأول لقصيدة