لِك الله غزّة : زجل
فؤاد العنيز
****************************************************
غزة ليوم
ثايرة طوفان
غزة ليوم
على فوهة بركان
نيران العديان
ونقولوا ولفناها
شهادة كرامة
ويا مبهاها
يا أم الشهيد
يا فحلة ولادة
يا أم الرجال
ونسا فوق لعادة
والله ثم والله
اولادك ما ماتوا
هزوا رواحهم فكفوفهم
ونفوسهم فوق نيوفهم
وعراوا صدورهم للنار
نار العديان ما قتلتهمش
والله ثم والله
نار العديان ما قتلتهم
لكن نار اخرى
يا حسرتي مقساها
كايدة جمرة
من ناداتو ونساها
نار لحباب يا حسرة
لا ضمير فاق
لا طرف اهزع
ملي خوتهم فالدم
فالدين وفالهم
يضربوها بسكتة
لا عين شافت
لا قلب وجع
يا أم الشهيد زغرتي
ملي بنار لعدو
ولادك وبناتك يموتوا
وقولي والله ما ماتوا
وخلينا نزغرتوا معاك
الولد ولدنا والبنت بنتنا
وابكي بالدم يا أم الشهيد
ملي يموتوا وما نشوفوهمش
ملي يموتوا وما نعرفوهمش
ملي يقتلهم نكراننا
ملي يقتلهم صمتنا
لك الله يا غزة
لك الكرامة والعزة
لك نسا
لك ارجال
بعزيمة تذوب لحديد
وتخلي الحال
يسول الحال
ياك لعدا ضحاوا قومان
من حدود لما
حتى لميريكان
وحدك غزة
فوجه نارهم
وحدك غزة
واللي ضحاوا
تنوبي عنهم
تفدي ثارهم
بصدر عريان
بقوة وايمان
انتِ نارهم
وانتِ عارهم
غزة لعزة
خلي نارك
تحرق نارهم
اترك تعليقاً
لن يتم نشر البريد الإلكتروني الخاص بك. الحقول المطلوبة مؤشرة بعلامة *